• is
  • en

Snjóflóð

Eitt það hættulegasta við ferðalög í fjallendi að vetrarlagi eru snjóflóð en með skynsamri ferðahegðan og réttu leiðarvali er hægt að lágmarka för ferðalanga um snjóflóðasvæði.

Að átta sig á því hvaða svæði eru hættumeiri en önnur er flókið en þó má einfalda það með nokkrum atriðum. Almennt má segja að þar sem skafrenningur safnast fyrir í brattlendi þar sé snjóflóðahætta og við þetta má bæta að flóð falla helst í 30° – 55° halla og því minni viðnám sem snjóalög hafa við hvort annað því meiri hætta á snjóflóðum.

Merki um yfirvofandi snjóflóðahættu

  • Nýfallin snjóflóð er skýrasta dæmið um yfirvofandi snjóflóðahættu
  • Skafrenningur eða áköf ofankoma
  • Vindfleki og merki um að snjórinn sé illa tengdur undirlagi sínu eins og holahljóð, brestir eða sprungur
  • Snögg hitastigsaukning eða hiti yfir frostmarki
  • Rigning
  • Snjóboltar sem rúlla

Leiðarval í fjallendi skipir meginmáli þegar reyna á að forðast snjóflóðahættusvæði en meginreglan er auðvitað sú að dalbotn er hættuminnsti staðurinn. Ef nauðsyn er að ferðast um hættusvæði skal gæta ýtrustu varúðar. Ákveða skal öruggan stað til að stoppa á og síðan fer einn í einu yfir hættusvæðið.

Ef svo illa fer að ferðafélagi lendir í snjóflóði skipta skjót og góð viðbrögð þeirra sem ekki lenda í flóðinu sköpum fyrir lífsmöguleika þess sem í flóðinu lendir

  • Gerið snöggt mat á frekari snjóflóðahættu og metið hvort setja þurfi upp vakt
  • Hefjið strax leit með snjóflóðaýli
  • Ef snjóflóðaýlir er ekki með í för skal merkja strax staðinn sem viðkomandi sást síðast
  • Merkið einnig staðinn þar sem hann lenti í flóðinu
  • Hefjið leit á yfirborði flóðs og merkið alla staði þar sem hlutir finnast
  • Líklegustu staðir eru þar sem flóðið hefur sest til þ.e. í tungunni, við beygjur og við stóra steina
  • Sendið strax eftir aðstoð

Slysavarnafélagið Landsbjörg Skógarhlíð 14, 105 Rvk. Ísland safetravel@safetravel.is +354 570-5900