Vélsleðar

Vélsleði veitir mikið frelsi. En í þessu frelsi vélsleðamennskunnar eru einnig faldar helstu hætturnar.

  • Til að geta mætt þeim aðstæðum sem upp kunna að koma þurfa bæði sleði og ökumaður að vera í toppstandi.
  • Tiðarfar hérlendis er oft þannig að vel negldur sleði getur gert gæfumun á ferðalagi.
  • Góð veifa á stöng aftan á sleðanum nýtist vel þegar ferðast er í slæmu veðri.
  • Nauðsynlegir varahlutir þurfa að vera með í för. Aukagangur af kertum og varareim er lágmarksbúnaður.
  • Ökumaður þarf að vera líkamlega í stakk búinn til að takast á við þær aðstæður sem upp kunna að koma.
  • Skyndihjálparkunnátta þarf að vera til staðar.
  • Enginn ætti að fara einn í ferð.
  • Fylgstu með veðurspá, aðstæðum og færð.

Góður ferðafélagi er gulls ígildi, góður búnaður er nauðsyn en hvorugt skiptir nokkru máli ef góð ferðahegðan er ekki viðhöfð þegar ferðast er.

  • Halda skal hópinn en þó ekki aka svo þétt að ef eitthvað hendir fremsta mann geti sá næsti ekki stöðvað.
  • Í slæmu veðri má raða hópnum upp í tvöfalda röð og aka það þétt að menn sjái næsta mann fyrir framan og manninn sér við hlið.
  • Ljóst þarf að vera hver hefur forystu og velur leiðina en allir þurfa þó að vera tilbúnir að grípa inn.
  • Aldrei skal ofmeta eigin getu né tækjanna.
  • Nauðsynlegt er að kunna 100% á staðsetningartækin og nota sannreynda GPS punkta.
  • Betra er að bíða veður af sér í skála eða í fönn heldur en að berjast áfram í vonlausum aðstæðum.
  • Fylgstu með kennileitum og lærðu á landið.
  • Notaðu GPS tækið sem hjálpartæki en aktu ekki „meðvitundarlaus“ um fjöll og firnindi.
  • Hafðu kortið í GPS tækinu passlega „súmmað“ út eða inn, þú verður að sjá hvaða landslag er framundan.
  • Hópurinn ætti að stoppa oft og ræða saman um skipulag , þannig læra menn á hver annan og forðast misskilning.

Áfengisdrykkja og akstur vélsleða á aldrei saman

Búnaður vélsleðafólks

Viðeigandi öryggisbúnaður er jafn nauðsynlegur og sleðinn sjálfur.

  • Hjálmurinn er staðalbúnaður í hvert sinn sem ekið er
  • Brynjur vernda bæði brjóstkassa og bak t.d. ef ekið er fram af hengju eða ofan í gil
  • Fatnaður þarf að vera í lagi, öll lögin þrjú.
  • Sjúkrakassi, svefnpoki, varpoki (bivac) og annar búnaður ef liggja þarf úti
  • Fjarskiptatæki
  • Hin heilaga þrenning á alltaf að vera með, skófla, snjóflóðastöng og snjóflóðaýlir

Þú finnur ítarlegri búnaðarlista hér og hér að neðan má sjá stutt myndband um heilaga snjóflóðaþrenningu.